«Ես կարողանում եմ» ստուգատեսի շրջանակում մայիսի 10-ին  առաջին դասարանցիների լողի ստուգատեսն է:

Ֆիզկուլտուրան կազմակերպվում է ամենօրյա պարապմունքներով, որոնք ներառում են մարմնամարզական վարժություններ, շարժուն խաղեր, հեծանիվ: Առաջին դասարանցիները շաբաթական մեկ անգամ լողում են կրթահամալիրի փակ լողավազանում: Ծրագրի մաս են նաև քայլարշավները, բարձունք արշավելը, որոնց ընթացքում սովորողները ծանոթանում են անվտանգ գործունեության տարրերին: Ուսումնական պլան, կետ 29

Վայրը՝ Արևմտյան դպրոցի փակ լողավազան
Օրը՝ մայիսի 10
Ժամը՝ 10:00
Մասնակիցներ՝ Հյուսիսային դպրոցի 1-1 դասարանի սովորողներ
Մարզիչ՝ Քրիստինա Հարությունյան

Ստուգատեսի նպատակն է ներկայացնել առաջին դասարանցիների լողալու, լողին նախապատրաստվելու հմտությունները:

Նպատակը՝

Լողը լողալու հիմնական հմտություններ զարգացնելուց, մարմինը կոփելուց, հոգնածությունն ու լարվածությունը թոթափելուց զատ, սովորողներին օգնում է ձեռք բերել մի շարք կարևոր հմտություններ: Լողին նախապատրաստվելը դիտարկվում է որպես ինքնուրույնության ու ինքնասպասարկման կարևոր հմտությունների ձեռք բերման հարթակ, որտեղ սովորողները սովորում են զգեստափոխվել, դասավորել իրենց հագուստն ու իրերը համապատասխան արկղիկներում, պահպանել անձնական հիգիենայի կանոնները:

Խնդիրները

• նախապատրաստվել լողին (դասավորել ուսապարկը, հանել-հագնել հագուստը, ընդւնել ցնցուղ, կատարել նախավարժանք),
• լողալու կարողությունների ցուցադրություն, արդյունքների արձանագրում,
• մարզական կարողությունների (քայլք, նախավարժանք) ցուցադրում,
• ինքնուրույնության, ինքնասպասարկման ու խնամքի հմտությունների ցուցադրում:

Լողուսուցման փուլերն են՝

• Համապատասխան ուսապարկում դասավորել լողի համար անհրաժեշտ պարագաներն ու իրերը.
• Քայլք մինչև լողավազան.
• Նախապատրաստում լողին, որն իր մեջ ներառում է զգեստափոխվելը, նախավարժանքն ու ցնցուղի ընդունումը,
• Լողը,
• Լողալուց հետո ցնցուղ ընդունելը, հագնվելը:

Կազմակերպում

Լողի ստուգատեսը կազմակերպվում է մի քանի փուլով: Առաջին փուլը նախապատրաստական է: Այս փուլի ընթացքում սովորողները տանը պատրաստում են փոքրիկ տեսանյութ՝ ներկայացնելով, թե ինչ կա իրենց լողի ուսապարկում: Տեսանյութերը հրապարակվում են դասվարի բլոգում:

Լողի ուսապարկում անհրաժեշտ է ունենալ՝

• լողազգեստ, լողաթափ
• սրբիչ
• գլխարկ ու մազակալ՝ աղջիկների համար
• լրացուցիչ հագուստ (շապիկ, գուլպա, վարտիք, այլ)
• թաց ու չոր անձեռոցիկներ
• ձեռնոց, աղբի տոպրակ
• արևային եղանակին՝ արևապաշտպան գլխարկ, ակնոց,
• անձրևային եղանակին՝ համապատասխան հագուստ ու կոշիկներ
• շշով ջուր:

Լողի ստուգատեսի երկրորդ փուլում առաջին դասարանցիները ըստ լողի պարապմունքի ժամանակացույցի մասնակցում են ստւգատեսին: Սովորողները լողի համար անհրաժեշտ պարագաների ուսապարկով կրտսեր դպրոց-պարտեզից քայլքով անցնում են մինչև Արևմտյան դպրոց-պարտեզի փակ լողավազան ճանապարհը՝ ցուցադրելով քայլքի իրենց հմտությունները: Քայլքի ընթացքում կարող են հաշվել ժամանակը, քայլերի քանակը, այլ: Ընթացքը կարող է նաև ուղեկցվել բերանացի ընթերցումներով, երգերով, ճանապարհի դիտարկումներով, անհրաժեշտության դեպքում հավաքում են աղբը: Ընթացքը տեսանկարահանվում է, ներկայացվում է տեսաֆիլմի տեսքով:

Ստուգատեսի երրորդ փուլում սովորողները զգեստափոխվում են, իրերը դասավորում են համապատասխան արկղիկներում, ընդունում են ցնցուղ, կատարում են նախավարժանք:

Չորրորդ փուլում լողում են լողավազանում՝ ի ցույց դնելով իրենց ձեռք բերած հմտությունները:

Լողի ցուցանիշները

• Ոտքերի մկրատաձև շարժումներ՝ կրծքի վրա
• Ոտքերի մկրատաձև շարժումներ՝ մեջքի վրա
• Շնչառական վարժություն՝ 2-4 վրկ.
• Ազատ ոճի լող:

Արդյունքները գրանցվում են սովորողի զարգացման բնութագրում: Տեսաֆիլմերը հրապարակվում են դասվարի բլոգում՝ կից մեկնաբանությամբ: