Լողը սովորողների ամենասիրելի գործունեություններից մեկն է: Լողուսուցումը դիտարկվում է որպես մարմնակրթության բաղկացուցիչ: Այն բացի լողալու հիմնական հմտություններ զարգացնելուց, մարմինը կոփելուց, հոգնածությունն ու լարվածությունը թոթափելուց զատ, սովորողներին օգնում է ձեռք բերել մի շարք կարևոր հմտություններ:

Աշնան տաք օրերին շարունակելու ենք լողալ Հյուսիսային դպրոցի բացօթյա լողավազաններում: Լողալու ու խաղալու ենք ջրում` աստիճանաբար զարգացնելով լողալու հմտությունները:

Լողին նախապատրաստվելը դիտարկվում է որպես ինքնուրույնության ու ինքնասպասարկման կարևոր հմտությունների ձեռք բերման հարթակ, որտեղ սովորողները սովորում են պահպանել անձնական հիգիենայի կանոնները:

Լողուսուցման փուլերն են՝

• Նախապատրաստում, որն իր մեջ ներառում է նախավարժանքն ու ցնցուղի ընդունումը
• Լողը
• Լողափին գտնվելն ու ինքնասպասարկումը:

Լողավազանի կազմակերպման և շահագործման կարգ

Լողափին բոլորը   լողազգեստով են կամ հարմար մարզազգեստով, լողաթափիկներով:
Շահագործումից հետո լողավազանը ծածկվում  է հաամապատասխան ծածկոցով, առավոտյան՝ բացվում: Լողովազանից օգտվելուց առաջ և հետո սովորողները լողանում են ցնցուղի տակ: Լողավազանը միայն լողալու համար չէ:  Նրա շուրջ հավաքվում են լողափնյա գործունեությունը կազմակերպելուն անհրաժեշտ գույք, պարագաներ, նյութեր։

Լողափի միջավայրին ներկայացվող պահանջներ՝

• համապատասխան չափի լողավազան,
• ջուրն ախտահանելու սարք,
• այլընտրանքային ցնցուղներ,
• ջրի և օդի ջերմաստիճանը չափելու ջերմաչափեր,
• լողավազան տանող սահարան-աստիճան,
• արևից պաշտպանվելու միջոցներ,
• գետնին պառկելու հարմարանքներ,
• սեղաններ, աթոռներ, նստարաններ, գնդակներ,
• ճոճանակներ, ճոճքեր (գամակներ), սահարաններ,
• գետինը ծածկված  է ավազով կամ գլաքարով:

Սովորողների և աշխատողների անհատական միջոցներ՝

• արևապաշտպան գլխարկ,
• լրացուցիչ հագուստ և լողազգեստ,
• սրբիչ,
• արևապաշտպան քսուքներ,
• հարմար լողափնյա կոշիկներ (լողաթափիկ):

Հիգիենա  և անվտանգություն

• Լողավազանի ջուրը միշտ թափանցիկ է, զուլալ:
• Գետինը ծածկված է գլաքարով:
• Արևից պատսպարվելու այլ հարմարություններ կան:
• Կան լողացնցուղներ, ջուրը տաքանում է արևի ջերմությամբ:
• Լողավազանն ապահովված է ջուրը մաքրելու համապատասխան տեխնիկական և
  մաքրելու անհրաժեշտ միջոցներով:
• Լողավազան մտնելուց և դուրս գալուց հետո սովորողները  ցնցուղի տակ լողանում են:
• Լողավազանը շահագործելուց հետո սովորողները հավաքում են, դասավորում պարագաները, կարգի բերում լողափը:
• Սովորողների անվտանգության պատասխանատուն մանկավարժական աշխատողներն են:
• Սովորողներն ու աշխատողները ամառային լողափում լողազգեստով կամ համապատասխան հագուստով են, լողակոշիկներով, սրբիչով, գլխարկով:
• Մանկավարժական աշխատողների լողալ կարողանալը պարտադիր է:
• Ջրի բարձրությունը լողավազանում սովորողների հասակին համապապատասխան է:
• Սովորողները նախապես նախավարժանքով պատրաստվում են լողավազան մտնելուն:
• Արևի տակ բոլորը գլխարկով են:
  Առողջագետը սովորողների առողջության պահպանման, լողափի հիգիենիկ վիճակի վերահսկող-պատասխանատուն է: